Кина ги забранува мобилните телефони во сите училишта

Учениците од основните и средните училишта ширум Кина веќе не смеат да носат мобилни телефони на училиште, освен ако немаат нужна потреба и доколку нивните родители достават писмено барање со детално образложение, се вели во новата одлука објавена на веб-страницата на кинеското Министерство за образование.

Во случај да има пишано барање од родителите, се нагласува дека учениците кои ќе смеат да носат мобилни телефони, мораат истите да ги предадат на надлежните во нивните училишта, наместо да ги носат со себе на час. Соодветно на тоа, училиштата ќе бидат надлежни да ја спроведуваат целата постапка и да одлучуваат каде и како ќе се чуваат телефоните, како и кој ќе се грижи за нив.

Кинеското министерство вели дека овој потег ги штити учениците и им помага да се фокусираат на учење наместо да поминуваат време на Интернет и да играат видео игри.

Со цел да се олесни комуникацијата помеѓу учениците и нивните родители, ресорното министерство размислува за инсталирање на јавни телефони во училиштата, како и барање други иновативни решенија.

Исто така, наставниците веќе нема да смеат да доделуваат домашна работа на мобилни телефони или да бараат од учениците да ја испратат домашната задача на мобилните телефони.