Кина и ЕУ со одговор на американските тарифи – Зголемување за 84%, односно 25% царини за увозот од САД

Кина најави дека од утре ќе воведе дополнителни царини за увозот на стоки од САД, зголемувајќи ја царинската стапка на 84 отсто. Оваа одлука доаѓа по последната американска мерка со која беа воведени нови 50 отсто царини за кинеска стока. Со тоа, вкупната тарифа што САД ја применува на кинескиот извоз достигна 104 проценти, вклучувајќи ги претходните царини од 34 и 20 проценти.

Кина ја информираше Светската трговска организација дека постапките на САД претставуваат сериозна закана за стабилноста на глобалната трговија. „Ситуацијата опасно ескалира. Како една од погодените земји-членки, Кина изразува длабока загриженост и одлучно противење на овој неодговорен потег“, се наведува во соопштението од Пекинг.

Паралелно, и Европската унија реагираше на американските мерки. Европската комисија изгласа воведување на 25 отсто царини за американски стоки во вредност од околу 22 милијарди евра. На листата на ЕУ се најдоа производи како соја, бадеми, месо, тутун, боровинки, сок од портокал, како и индустриски материјали како челик, алуминиум и текстил.

Според најавите, дел од тарифите ќе стапат во сила на 15 април, други од средината на мај, додека царините за американските бадеми ќе се применуваат од 1 декември.