КК Гостивар денеска го пречекува актуелниот шампион МЗТ Скопје

Во вонреден термин за регуларниот дел од првенството, пред се поради настапите на гостинската екипа на меѓународна сцена, денеска КК Гостивар во рамки на 13.коло го пречекува актуелниот шампион, екипата на МЗТ Скопје.

Ова е дуел помеѓу првиот и третиот на табелата, „штрковите“ со 11 победи и 1 пораз се лидери со три бодови повеќе од гостиварци. МЗТ Скопје сезонава е учесник и во најсилната АБА лига, само како споредба таму состојбата е нешто поинаква. Од 16 одиграни натпревари избраниците на тренерот Драган Николиќ имаат само две победи и се на последното место во ова натпреварување. Додека единствениот пораз во домашното првенство на МЗТ Скопје им го нанесе токму КК Гостивар во 2.коло, но од тој натпревар до денешниот, тимот претрпе големи измени како во играчкиот кадар, така и на тренерската позиција.

Гостиварци во овој дуел влегуваат по поразот од Пелистер во минатото коло, но и кај нив дојде до промени во ростерот пред почетокот на вториот дел од првенството. Андреј Маслинко кој беше најавуван како големо засилување, ненадејно го напушти таборот и се пресели во Битола, а плејмејкерската позиција се засили со Кахлон Витли кој вечерва ќе дебитира на домашен терен. Голема предност за „бело-сините“ е што нема повредени играчи и денес ќе може да се претстави во најсилно светло пред домашната публика.

Меѓусебниот скор помеѓу овие две е на страната на МЗТ Скопје кои од 22 натпревари, откако гостиварци се дел од Првата лига има 16 победи, наспроти 6 победи на КК Гостивар.

Напреварот во Спортската сала Младост се игра од 19 часот, во живо дуелот може да го следите ТУКА.