КК Гостивар денеска патува за Кавадарци на мегдан со Еуроникел

После тринеделна пауза денеска продолжуваат возбудувањата во Првата македонска кошаркарска лига. Се игра 16.коло, кое поради вчерашната одлука на Владата, заради превенција од корона вирусот натпреварите ќе се играат без публика.

Кошаркарите на Гостивар, денеска гостуваат во Кавадарци, каде ќе се сретнат со екипата на Еуроникел. Кавадарчани се во потесниот круг во врвот на табелата, се наоѓаат на 5. место на табелата, со негатива од два бода зад лидерот на табелата МЗТ Скопје, односно еден од КК Гостивар, имаат скор од 10 победи и 5 порази, важат за тежок и непредвидлив противник, кој се бори за влез во Ф4 завршницата.

„Бело-сините“ во овој дуел влегуваат со обезбеден пласман во Супер лигата, 11 победи и 4 порази, избраниците на Србиноски во првиот меѓусебен дуел во Младост ја совладаа екипата на Еуроникел со резултат 94-87. Гостиварци патуваат во полн состав во градот на виното, вечерва можност за официјално деби ќе имаат последните две засилувања, американците Ентони Ли и Малком Армстед.

Натпреварот се игра од 19 часот.