КК Гостивар ги испрати странците дома, се чекаат подобри времиња

Американците од редовите на КК Гостивар Донован Доналдсон, Малком Армстед и Ентони Ли, поради состојбата со коронавирусот го напуштија Гостивар, односно си заминаа секој на своја страна во САД и Ѓорѓе Џелетовиќ замина во родната Србија, а домашните кошаркари веќе се во родните градови.

„Нема тренинзи, нема натпревари, засилени превентивни мерки, се повеќе заразени, впрочем сите гледате што се случува. Им предложивме на странците доколу сакаат може да се вратат во своите држави се додека не се стабилизира состојбата и не добиеме конкретни информации како понатака. За нијанса полесна е ситуацијата со домашните кошаркари бидејќи нивните домови и семејствата се тука. Негативните последиците од ова што се случува ќе бидат големи по клубот и спортот воопшто во земјава, но во моментов здравјето на кошаркарите и нашата публика е приоритет. Почитувајте ги сите препораките да се заштитиме самите и луѓето околу нас и што побрзо го совладаме и овој противник“, порачуваат од КК Гостивар.

Се поизвесно е дека оваа натпреварувачка сезона нема да го дочека официјалниот крај на првенството. КФМ го замрзна првенството на неодреден период и тоа пред самиот почеток на највозбудливиот дел од сезоната почетокот на Суперлигата, односно Ф4 завршницата. Сеуште нема конечена одлука како понатака, дали е ова конечен крај или ќе има продолжение за некое време.

Коронавирусот го застана КК Гостивар на 12 победи и 5 порази сезонава.