КК Гостивар го враќа сјајот на својата школа

Кошаркарскиот клуб Гостивар полека, но со сигурност ги остварува дадените ветувања од минатата сезона. Дека се решени својата иднина да ја темелат врз играчи од својот погон, говорат и најновите промени. Последна новина кај гостиварци е тоа што клубот целосно ја реорганизира и ја надградува младинската школа.

Од сезона 2018/2019, КК Гостивар во својата школа ќе ги има сите младински генерации. Целта на овој проект е напредок во кошарката. КК Гостивар да биде конкурентен и активен во младински категории, поттикнување и развој на кошаркарските таленти, социјализација и од „мали нозе” да им се всади љубовта кон „бело-синиот“ дрес. Почнувајќи од м12, м14, м16, м18 сите ќе се натпреваруваат во официјалните младински лиги. КК Гостивар ќе има претставник и во Третата кошаркарска лига каде ќе играат најталентираните кошаркари и оние кои се со помала минутажа во првиот тим. Сите таленти ќе имаат можност за екипен и индивидуален напредок, ќе ги посетуваат тренизите и работат со кошаркарите од првиот тим, сите ќе бидат КК Гостивар.

Ова е резулатат на тоа што гостиварскиот клуб се договори со неколку кошаркарски школи од Гостивар кои самостојно работеа со различни генерации, односно КК Кетс и КК Дамвер да преминат под капата на КК Гостивар. Координатор на младинската школа ќе биде Крсте Серафимоски, тренер на екипата во Трета лига ќе биде Петар Ангелов, како тренери ќе работат и Денис Селими, Никола Димитриески и Андреја Гавриловски. Со селективни тренинзи ќе се започне кон средината на август.

„Ова е дел од целиот проект наречен КК Гостивар. Сите знаеме дека Гостивар изобилува со спортски таленти во сите спортови. Сакаме на оние кои ја избрале кошарката да им ги обезбедиме сите потребни услови, да бидат дел од сериозен кошаркарски клуб и да не се грижат за нивната иднина, на младите кошаркари ќе остане само напорно да тренираат. Со овој проект голем бенефит ќе добие и македонската кошарка“, велат од КК Гостивар.