КК Гостивар ја почнува битката за опстанок против Шкупи

По скоро три недели пауза во домашното кошаркарско првенство, утре (23 април) стартува завршницата во Првата македонска кошаркарска лига за сезоната 2024/2025. Кошаркарскиот клуб Гостивар ќе ја започне својата борба за опстанок со натпреварот против Шкупи.

Натпреварот е закажан за среда (23 април) во салата „Младост“ во Гостивар, со почеток во 17:00 часот. Овој дуел претставува прв од серијата шест натпревари кои ќе го одлучат идниот прволигашки статус на тимот. Покрај Гостивар и Шкупи, во плеј-аутот се и екипите на Тиквеш и Вардар.

Гостивар, ја заврши регуларната сезона на 10. позиција со 7 победи и 15 порази, – резултат кој е под очекувањата и традицијата на клубот, кој за првпат во поновата историја се наоѓа во ситуација да се бори за опстанок преку плеј-аут. Сезоната беше исполнета со предизвици, но тимот сега има можност да се консолидира и да ја покаже својата вредност зголемувајќи ја надежта дека со поддршка од навивачите и максимална борбеност ќе го задржи своето место во Првата лига.

Форматот на плеј-аутот е лига-систем – секој тим игра против секој, дома и на гости. По сите шест кола, првите две екипи ќе обезбедат опстанок, а останатите две ќе испаднат во Втората лига.

Распоред на натпревари за КК Гостивар во плеј-аутот:

• Гостивар – Шкупи
• Тиквеш – Гостивар
• Гостивар – Вардар
• Шкупи – Гостивар
• Гостивар – Тиквеш
• Вардар – Гостивар

На кошаркарите на Гостивар им е потребна поддршка од трибините, сега повеќе од кога било. Победа на стартот може да биде клучен поттик за Гостивар во продолжението од плеј-аутот.