КК Гостивар ќе игра за титула! Совладан и Кожув 84:72

Кошаркарите на Гостивар и математички обезбедија учество во финалната завршница во борбата за титула. Совладувајќи го вечерва Кожув во Младост со резултат 84:72.

„Бело-сините“ одиграа одличен натпревар против петопласираната екипа на табелата, од самиот почеток на натпреварот наметнаа игра за која противникот немаше одговор. Почетните 10:1 беа само најава за убедливата победа за која придонесоа сите играчи на теренот.

Тенксли Ефианаи со 23 поени ги предводеше Гостиварци, Александар Костоски постигна 20 поени, од кои повеќе од пола во последните 5 минути кога погоди 4 тројки во серија, имаше и 10 асистенции. Џо Фурстинер запиша 15 поени и 14 скокови, Тасоски 9, Ре.Димитриески 8, Сегариќ 6 и Димчески и Стефаноски по 2 поени.

Кај гостите најрасположен беше Кешар кој постигна пола од поените на екипата 35.

Со оваа победа КК Гостивар се врати на третата позиција и веќе во четврток во Младост ќе гостува вториот тим од Гевгелија, Блокотехна.