КК Гостивар ќе одигра хуманитарен натпревар со Кожув (сабота, 17 часот)

Во сабота (05.10.2019), од 17 часот во спортската сала Младост во Гостивар ќе се одигра пријателски натпревар помеѓу екипите на КК Гостивар и КК Кожув од Гевгелија. Натпреварот ќе има хуманитарен карактер со цел да им се помогне на загрозените семејства од Гостивар.

Иницијативата за овој натпревар ја покрена раководството на гостиварскиот клуб.

„Ова најверојатно ќе биде последен контролен натпревар пред почетокот на сезоната. Ни гостува силна екипа која претендира пласман во горниот дел од табелата, со самото тоа не очекува атрактивен натпревар за следење. Сите собрани средства од купените влезници за натпреварот, ќе ги донираме на нашите сограѓани на кои им се најмногу потребни“, велат од КК Гостивар.

Влезниците за натпреварот ќе чинат 50 денари.

Од кошаркарскиот клуб Гостивар, апелираат до сите хумани луѓе и љубители на кошарката, да присуствуваат на генералната проба пред почетокот на првенството, со што ќе дадат и свој придонес во помошта на социјално загрозените семејства од Гостивар.

Во саботниот натпревар ќе дебитира најновото засилување на гостиварци, Марјан Младеновиќ.