КК Гостивар по „трета среќа“ денеска против Еуроникел

КК Гостивар го има најлошиот старт последниве неколку години, два порази од два натпревари, во првото коло од ФМП Академија, пред пет дена на домашен терен од Работнички, скор на кој спортската, посебно гостиварската јавност не е баш навикната. Но, никако не смее да се игнорира состојбата во која се најде гостиварскиот првологаш, излегување од ритам поради неколку неделното одлагање на почетоткот на првенството, ковид пандемијата која не го одмина клубот, 15-дневниот карантин остави трага врз играчите кои беа позитивни, многубројните повреди, тренирањето во вонредни услови поради исклучената струја во Младост, се само дел проблемите со кои се справува стручниот штаб на гостиварци.

Како и да е, денеска „бело-сините“ одат по „трета среќа“. Во Спортската сала Младост гостува екипата на Еуроникел од Кавадарци. Избраниците на Горан Самарџиев имаат две победи сезонава, против МЗТ2 и ФМП. Данило Мијатовиќ, Казарновски, Соколов, Караколев се добро познати имиња кои го носат дресот на кавадарчани сезонава, што доволно говори за квалитетот на оваа екипа, која претендира за висок пласман сезонава.

КК Гостивар, по одиграните 80 минути, сеуште ја бара својата препознатлива игра, на натпреварот со Работнички успеаа да анулираат предност од -22 поени, посебно имаа фуриозни 4 минути во последната четвртина што влева надеж дека овој тим на гостиварци кога сака-може.

Дуелот започнува од 18 часот, на жалост на гостиварската публика, натпреварот се игра без присуство на гледачи.

Пред почетокот на натпреварот ќе објавиме линк за следење во живо.