КК Гостивар пред празни трибини денес го пречекува МЗТ Скопје

Во најинтересниот дел од првенството, на гостиварската публика им се скрати задоволството во живо да го следат расплетот во Првата македонска кошаркарска лига кој се чекаше цела сезона.

Поради суспензија од два натпревари пред празни трибини, кои ги изрече КФСМ по инцидентот на натпреварот Гостивар – Пелистер, денеска во празната Младост, КК Гостивар ќе го пречека шампионот МЗТ Скопје.

„Штрковите“ се во трка за првото место на табелата, за кои овој натпревар е од голема важност. Избраниците на Александар Петровиќ сезонава запишаа 26 победи и само 4 порази.

Гостивар „нокаутиран“ по натпреварот со Пелистер, каде покрај поразот, суспензијата од два натпревари без публика, заработи и 165.000 денари парични казни, како и суспензија на тренерот Димитриевски од еден натпревар, денес треба без поддршка од трибините, без тренер да се соочи со учесникот во АБА лига. И традицијата не е на страната на домаќинот, сезонава гостиварци неамаат победа против МЗТ Скопје, а во последните 20 меѓусебни дуели МЗТ Скопје има 15, КК Гостивар 5 победи.

Но, за „бело-сините“ ништо не е загубено. На две кола до крај потребна им е една победа за пласман во завршниот Плеј-оф.

Тоа добро го знаат и љубителите на кошарката од Гостивар, кои активно учестуваат и во победите и во „билдањето“ на казните. Па за денешниот натпревар, на кој им е забрането присуство на трибините, организирано ќе го следат на видео бим на само 20-тина метри од теренот, позади Спортската сала Младост.

Дуелот КК Гостивар – МЗТ Скопје се игра од 19 часот.