КК Гостивар реди победи – совладан и Пелистер (79:91)

Три натпревари – три победи за повратникот во елитата Гостивар. По Фени и Кожув, Пелистер е на списокот на екипите кои гостиварци ги победија на стартот од сезоната. Во Битола, четата на Марјан Србиновски славеше со 91:79 и остана во кругот на екипи со максимален ефект по првите три кола.

И покрај поразот Пелистер, со новите американски засилувања се претстави во солидно издание, особено во првото полувреме. Гостивар речиси постојано беше во водство, но најмногу со осум поени разлика по што следуваше одговор од битолчани. На големата пауза се замина со 39:38 за Гостивар што најавуваше драматична борба до самиот крај.

Во 23. минута резултатот беше израмнет (47:47), но потоа дојде периодот кој имаше многу важна улога во врска со прашањето околу победникот. Тасовски со осум, Робев со три и Сегариќ со два поени се погрижија за серија од 13:0 по што Гостивар поведе со 60:47. Во последниот период Пелистер се доближи на 66:67, но уште една серија од 8:0 стави крај на сите дилеми.

На Пелистер му остана утеха дека го имаше најдобриот играч на натпреварот, новиот член на тимот Луис Роберт кој постигна 40 поени. Гостивар немаше таков индивидуалец, но победи како колектив чиј предводник беше Сегариќ со 20 поени.

Во соработка со:
Basketball.mk