КК Гостивар се подготвува за нешто големо – Малком Армстед ново мега засилување за „бело-сините“

Американецот со косовски и романски пасош Малком Армстед, е најновата инвестиција на Кошаркарскиот клуб Гостивар. Триесетгодишниот плејмејкер е доста искусен играч, низ кариерата има настапувано за Орегон, Автодор Саратов, АЕК Атина, Истанбул ББ, Јесилгиресун, Нептунас, Ретимно, Бујукчекмече, Кимис, Приштина, Пеќ. Како и за словенска Крка во чиј дрес беше најдобар стрелец во јадранската АБА лига во сезоната 2014/2015, после која преминува во белградски Партизан, но поради технички пропуст на „црно-белите“ не доби шанса во овој кошаркарски гигант.

Армстед има настапи и за репрезентациите на Косово и Романија.

Ова е петти интернационалец во редовите на КК Гостивар сезонава, зацртаната цел пред почетокот на сезоната, пласманот во Суперлигата и математички е обезбеден. Но, дефининитвно нешто се “крчка’ во таборот на гостиварци. Ангажманот на кошаркари од калибарот на Армстед и Ентони Ли, со скапите Џелетовиќ и Костоски, поддржани од искусните Тасовски, Димчевски, Штерјов, Димитриевски, феноменалното откритие Доналдсон е екипа за многу повисоки дострели отколку пласман помеѓу шестте најдобри екипи во лигата.

Дали се подготвува „атак“ на некој пехар?! Или можеби и на два? Ќе ги оправдаат ли на крајот на сезоната вложувањата стручниот штаб и играчите? Љубителите на кошарката во Гостивар и во земјава поприлично знаат да ги проценат дометите на екипите според квалитетот, за овој тим на КК Гостивар апсолутно тоа не е Суперлигата.

Не ни преостанува ништо друго освен да следиме и да ги чекаме одговорите на сите ове прашања после репрезентативната пауза во бурната кошаркарската пролет која ни претстои и тоа не во некоја далечна европска земја или на екстра спротски ТВ канал, туку тука, дома, во Спортската сала Младост во Гостивар.