КК Гостивар со важна победа во плејаутот против Шкупи! (81-78)

Во возбудлив и изедначен натпревар од првото коло на плејаут фазата во Првата кошаркарска лига на Македонија, КК Гостивар славеше со резултат 81:78, против директниот конкурент за опстанок екипата на Шкупи од Скопје.

Натпреварот се одигра попладнево во Спортската сала „Младост“ во Гостивар, пред малкубројна публика која беше сведок на драматичен финиш и силна тимска игра на домашниот состав. Гостивар ја покажа својата борбеност во последната четвртина, кога успеа да ја задржи минималната предност и со храбра игра дојде до значајна победа на стартот од завршницата.

Вукашин Ѓорѓевиќ со фантастичен учинок од 25 поени, 18 скока и 1 асистенција, беше незапирлив под кошевите и клучен за победата на домаќините, Митевски додаде 19 поени, 7 скока и 5 асистенции. Кај гостите се истакна Арнолд В., кој постигна 25 поени.

Во следното коло на плеј-аутот, Тиквеш го пречекува КК Гостивар, а Шкупи ќе биде домаќин на Вардар.