КК Гостивар стартуваше со подготовките за новата сезона

Кошаркарскиот клуб Гостивар официјално ги стартуваше подготовките за новата сезона во Првата лига. Со нов шеф на стручниот штаб, Љупчо Малинков, и со амбиции да се остварат многу подобри резултати од минатогодишните, „бело-сините“ означија почеток на подготовките.

По почетната прозивка гостиварци во Спортската сала Младост го одработија и првиот тренинг. На располагање на тренерот Малинков, на кој ќе му асистира Никола Димитриевски се одзваа играчите: Ренато Димитриевски, Роберт Димитриевски, Виктор Ефремовски, Војче Лефкоски, Тома Стојановски, Енур Шазан како и репрезентативните засилувања Андреј Маслинко и Максим Митевски. Вечерва треба да пристигнат и интернационалците Гиорги Корсантиа и Луван Пипкинс, кој треба да допатуваат од Грузија, односно САД.

„Имаме добра екипа на располагање,  сеуште не е одреден системот на натпреварување за да може прецизно да одредиме амбициите за сезоната што следи, но сигурно е дека секој натпревар ќе одиме на победа и целиме во горниот дел на табелата. Подготовките ќе ги одработиме на спортските терени во Гостивар, во план се и подготвителни натпревари, поканети сме на неколку меѓународни турнири во Косово и Грција, во зависност од можностите и тајмингот, можно е со нив да ги завршиме подготовките. Што се однесува до засилувањата разгледуваме уште неколку опции на центарската позиција. Очекувам возбудлива сезона и се надевам ќе ја задоволиме гостиварската публика, изјави Малинков за Gostivarpress.mk.

Почетокот на првенството е закажано за првиот викенд во октомври, претходно треба да се одржи ждрепка по која ќе се знае распоредот за сезоната 2022/23.