КК Гостивар во последната секунда загуби од Работнички 91:90

Кошаркарите на Гостивар загубија на гостувањето во Градски парк против Работнички со 91-90.

Искусниот Мијатовиќ ја донесе победата на Работнички, буквално во последната секунда. Гостиварци одиграа одличен натпревар. Имаа предност во поголемиот дел од мечот, добивајќи ги првата и втората четвртина, на полувреме имаа предност од 42:50. Домаќините добивајќи ја третата четвртита успеаа да се вратат во игра, во последниот период во кој се одигра една цела драма, се влезе со резултат 68:67. Гостивар на 5 минути имаше предност од 70:79, но како се ближеше крајот, така победникот беше понеизвесен. На 25 секунди пред финишот со погодокот на Бенџамин домаќините имаа поен предност, Гостивар беше во напад и Доналдсон погоди за два и предност на КК Гостивар од 89:90 на секунда пред крајот. И кога сите мислеа дека е готово Работнички за 1 секунда, преку Мијатовиќ успеа да постигне кош и слави со 91:90.

Најдобар стрелец во победата на Работнички беше Лесколт со 25 поени, додека Данило Мијатовиќ постигна 17 поени.

Кај гостиварци одлична партија одигра американецот Доналдсон кој запиша 21 поен, 10 скока и 8 асистенции. Тасоски и Џелетовиќ запишаа по 16 поени.