Кога сакате здрав деликатесен намаз одберете хумус

Хумусот е еден од најпопуларните намази во вегетаријанската исхрана, но омилен е и кај оние кои го сакаат ориенталниот вкус. Се прави од наут, маслиново масло, лимонов сок и сол.

Одличен е за дијбетичари, поради нискиот гликемски индекс на наутот, со кој се подготвува и сложените јаглехидрати кои ги содржи, го контролира нивото на шеќер во крвта. Хумусот е здрав меѓу оброк, го потпомогнува дигестивното здравје, ја зголемува енергијата. Наутот е извор на амино киселини кои му даваат здраво градење на мускулните влакна во нашето тело, обнова на ткива и продукција на енергија. Бидејќи и маслиновото масло е една од состојките со кои се подготвува хумусот, тој е богат со омега-3 масни киселини кои имаат многу корисно дејство за нашето тело и му помагаат во одржувањето на кардиоваскуларнотото здравје и здрав нервен систем.

Подготовка на наут за домашен хумус

Подготовката на овој здрав и вкусен намаз е едноставна. Наутот е основната намирница на хумусот. Во продавниците обично наоѓаме сув наут, но истиот може да го купите и во конзерва, спремен за конзумација.

Подготовката на хумусот пожелно е да го планирате однапред, бидејќи наутот треба предходно да го закиснете. Најдобро е да го оставите да преноќи во вода, колку подолго е натопен, толку пократко ќе го готвите. Доколку бил потопен 8 часа, потребно е да го варите околу 1 час, а доколку бил 12-16 часа, ќе треба да го варите нешто помалку од еден час.

Наутот потопен во вода ќе набoбри, но нема да омекне. Добро е да го измиете пред готвење. Ставете го во сад, додадете вода и малку сол, па вараете го на силен оган. Оставете го некое време да отстои во топлата вода. Отстранете ја водата и наутот е спремен за употреба.

Рецепт за подготовка на хумус

Потребни намирници:

2 чаши варен наут (ако го подготвувате дома) или конзервиран наут
Половина чаша таан (паста од сусам)
¼ чаша маслиново масло
2 чешниња лук
Сол и бибер
Сок од 1 лимон
Сецкан магдонос за декорација

Начин на подготовка:

Ставете ги сите намирници во блендер (освен магдоносот) и блендирајте. Додадете малку од водата во која се варел наутот (или водата од конзервата наут), додека не добиете смеса со густина на пире. Добиената смеса ставете ја во еден сад и хумусот е спремен за сервирање. Сервирајте со ливчиња магдонос, една лажица маслиново масло и малку бибер. Намазот може да го јадете намачкан на интегрално лебче, како додаток на домашните сендвичи или во комбинација со зеленчук, како моркови, целер, краставици.

Вреди да се проба…