„Кога жена-мајка нешто ветува, тоа мора да се оствари – се обврзувам за посреќни семејства во Македонија“, порача Стојаноска

Носителот на листата од ВМРО ДПМНЕ и Коалицијата „Обнова на Македонија“, Дафина Стојаноска денес во Гостивар беше на средба со членки на Унијата на жени и Движењето за национално единство на Турците.

„Сите ние без разлика дали се викаме Дафина, Махмуде, Анета, Зејнеп или Гордана, без разлика кој јазик го зборуваме, каде и на кого се молиме, сите ние најдобро знаеме да ја почувствуваме грижата за семејството. Дојдено е време да си ги заштитиме семејствата, зашто секој ден е се’ потешко. И секој ден не’ боли душата. Затоа, јас како носителка на листата во изборна единица 6 од ВМРО ДПМНЕ и Коалицијата „Обнова на Македонија“ се обврзувам дека ќе се грижам македонските семејства да добијат повеќе. А кога жена-мајка нешто се обврзува, тоа и го реализира, тоа мора да се оствари. Ние денес се обврзуваме дека на 15 јули ќе го закружиме бројот 14, за посреќни семејства во Македонија, истовремено посреќни мајки и посреќни деца“, порача Стојаноска.

Предизборната агенда на ВМДО ДПМНЕ и коалицијата во Гостивар денес продолжува на средба со граѓани во населбата Циглана.