Кои професии најдобро заработуваат во Македонија?

Компјутерските програмери и консултантите имаат најголеми плати во Македонија. Според извештајот на Државниот завод за статистика, вработените во групата дејности – компјутерско програмирање, консултантски и средни дејности, во декември 2016 г. земале просечна месечна плата од 68.896 денари. Во однос на претходните пресметки од ноември, се бележи зголемување на личниот доход од околу 10%.

По нив, на листата на најдобро платени се наоѓаат  правниците и сметководителите со 59.124 ден. Високо котираат и вработените во воздухопловниот транспорт со цифра од 54.827 денари, како и во телекомуникациите со 48.450 денари, но и фармацевтите за кои е пресметано дека во просек земаат по 43.900 денари месечно.

Ако се ова професиите кои најдобро заработуваат, кои се оние кои се на дното по месечна плата?

Според податоците, најниски плати има во текстилната и кожарската индустрија кои се движат од 11.000 до 13.500 денари. За нијанса повеќе земаат работниците во градежништвото и производство на мебел.

Инаку, просечната месечна нето-плата по вработен во Македонија, во декември 2016, изнесува 23.457 денари. Тој месец, 1.6% од вработените во Република Македонија не примиле плата.