Кои професии се најисплатливи во Македонија?

Од околу 13 до над 55 илјади денари се движи просечната исплатена плата по сектори во Македонија во месец март.
Според пресметките на Државниот завод за статистика, највисоки месечни примања имаат компјутерските програмери, вработените во воздухопловство и во телекомуникации. За овие професии платите се движат од 48.500 до над 56.000 денари. По нив, на листата на најдобро платени се наоѓаат фармацевтите и оние кои се занимаваат со финансиски дејности и маркетинг со цифра од 40 до 45 илјади денари.
Ако се ова професиите кои најдобро заработуваат, кои се оние на дното по месечна плата во земјава?
Најниски се платите на текстилците, работниците во кожарската индустрија и помошни услужни дејности кои се движат од околу 13 до 15 илјади денари.
Инаку, според ДЗС, просечната месечна нето-плата по вработен во Македонија, во март 2018, изнесува 23.694 денари.