Кои се можните причини поради кои стапалата ви се студени?

Студените стапала и нозете под колената често се резултат на недоволно топли чорапи и чевли или слаба циркулација. Колку и да се чести, особено во постудениот дел од годината, студените стапала кои не можат да се загреат со ништо може да бидат последица на посериозен здравствен проблем. Силно чувство на страв, нервоза, но и неправилно функционирање на тироидната жлезда, настинки, периферна невропатија, се некои од причините зошто би можеле да се ладни стапалата.

Ослабена циркулација

Ослабената циркулација е главно резултат на недоволна физичка активност и предолго седење. Кога циркулацијата е добра, сите органи добиваат доволно количество хранливи материи и кислород. За овој систем да функционира добро, крвните садови мора да бидат еластични и проодни. Слабата циркулација може да биде и последица на атеросклероза или згрутчување на крвта (тромб), што може да го блокира крвниот сад, што резултира со помалку хранливи материи и кислород во телото. Во најтешките случаи доаѓа до целосна блокада на крвниот сад и срцев или мозочен удар.

Затоа се препорачува, особено ако имате над 50 години, да откриете зошто се ладни стапалата. Секогаш се препорачуваат редовни прегледи за лица чиј член на блиското семејство има атеросклероза или тромб. Експертите советуваат сите да прават редовна физичка активност која може да ја разбуди „заспаната“ циркулација, а од помош можат да бидат и добрите памучни чорапи и чевли.

Неправилно функционирање на тироидната жлезда

Хипотироидизмот е резултат на недоволно лачење на тироидните хормони, поради што стапалата се ладни. Пациентите се жалат на студени стапала и раце, замор, зголемување на телесната тежина како и опаѓање на косата.

Тироидната жлезда ги произведува хормоните тријодотиронин Т3 и тироксин Т4, кои, меѓу другото, го регулираат метаболизмот, температурата на телото, му ја обезбедуваат потребната енергија на телото, ја контролираат работата на кардиоваскуларниот систем и развојот на функциите на мозокот. При слабеење на функцијата на тироидната жлезда се појавуваат наведените симптоми. Совет е да се посети лекар доколку стапалата се постојано ладни.

Воспаление на мочниот меур

Народната медицина смета дека воспалението на мочниот меур може да биде последица на изложеност на студ. Модерната медицина во голема мера ја прифаќа оваа претпоставка. Се верува дека кога ни е ладно, крвта се пренасочува кон горниот дел од телото, за да се загрее. Во овие состојби, бубрезите може да почнат повеќе да лачат урина за да го стабилизираат крвниот притисок. Можно е да има дисбаланс на сол и минерали во телото.

Зголеменото мокрење и покрај ниската температура на воздухот и несоодветните обувки не пречи на сите,а почесто се јавува кај жените и постарите лица.

Циститис или инфекција е воспаление на мочниот меур и најчесто е предизвикано од бактериска инфекција, најчесто од ешерихија коли, особено во постудениот дел од годината.

Периферна невропатија

Периферна невропатија или полиневропатија е оштетување на нервите кои минуваат низ телото надвор од мозокот и ‘рбетниот мозок. Покрај студените стапала, оваа состојба е придружена и со вкочанетост, пецкање, печење во нозете. Периферната невропатија е знак за оштетување на нервите, често се јавува кај луѓе кои боледуваат од дијабетес, се јавува и како резултат на инфекција или дејство на токсини.

Се препорачува доколку често се чувствуваат горенаведените симптоми да се консултира со лекар бидејќи постои можност периферната невропатија да се искомплицира и да оштети поголем број на нерви. Состојбата може да е резултат на недостаток на есенцијални витамини, најчесто од групата Б витамини, кои се неопходни за здравјето на нервите.

Кога треба да се посети лекар?

Студените стапала или раце често може да бидат резултат на нервоза, страв и вознемиреност, но доколку симптомите се тешки и траат долго, се препорачува посета на лекар и стручна помош.

Како да ги загреете ладните стапала?

Се препорачува секогаш да се облекувате соодветно и да избегнувате синтетички материјали. Неопходно е да се ограничи внесувањето на алкохол и чад од тутун. Соодветната исхрана со многу есенцијални минерали и витамини може да ни обезбеди добар имунитет и да нè загрее. Повеќе минерали од железо, витамин Б12 и фолна киселина може да ја подобрат циркулацијата.

Се препорачува кога подолго време седите, да се движите и да ги истегнувате стапалата од време на време. Лекарите советуваат да се обидеме подобро да ги контролираме стресните ситуации, на пример со вежби за дишење, пешачење во природа, проверка на нивото на холестерол и, доколку е потребно, редовно земање лекови.