Кои се можните причини за честа утринска вртоглавица?

Можни причини за вртоглавица по будењето може да укажуваат на дехидрација, инфекција на увото, низок крвен притисок, несакани реакции на некои лекови и некои други проблеми. Третманот на утринската вртоглавица зависи од нејзината причина.

Повеќето луѓе повремено доживуваат вртоглавица, која може да се манифестира на различни начини, вклучувајќи: чувство на слабост или несвестица, чувство на нерамнотежа или дезориентација, чувство на вртоглавица. Вртоглавицата е често привремена и не секогаш има јасна причина. Сепак, редовното будење со чувство на вртоглавица може да не предупреди дека имаме здравствен проблем.

Еве неколку причини кои можат да предизвикаат утринска вртоглавица:

Дехидрација

Луѓето кои се дехидрирани во текот на ноќта може да се разбудат со чувство на вртоглавица или губење на рамнотежа. Други симптоми на дехидрација вклучуваат: жед, замор, главоболки, сува уста и усни.

Причини за дехидрација кои се јавуваат по добар сон може да бидат: недоволно внесување течности во текот на денот, спиење во топла соба, прекумерно консумирање алкохол, болести кои предизвикуваат повраќање и дијареа, употреба на лекови кои го зголемуваат мокрењето или прекумерно консумирање на пијалоци со кофеин.

Низок крвен притисок

Нискиот крвен притисок, познат како хипотензија, може да предизвика вртоглавица кај некои луѓе. Крвниот притисок може нагло да падне кога некое лице ја менува положбата од лежење во стоечко, на пример, кога станува од кревет наутро. Оваа ненадејна промена на крвниот притисок се нарекува ортостатска хипотензија.

Симптомите на ортостатска хипотензија може да вклучуваат: вртоглавица, чувство на несвестица, заматен вид, несвестица и паѓање.

Нискиот крвен притисок може да биде симптом на одредени болести, како Паркинсонова болест или Адисонова болест. Исто така, продолженото лежење и некои лекови, како што се бета-блокаторите, може да предизвикаат хипотензија.

Постепеното стоење може да помогне да се спречи вртоглавица, а носењето компресивни чорапи може да ги намали симптомите. Доколку лековите предизвикуваат низок крвен притисок, доктор може да ја прилагоди дозата или да ја промени терапијата.

Низок шеќер во крвта

Вртоглавицата наутро може да биде симптом на низок крвен шеќер, познат како хипогликемија. Оваа појава е почеста кај луѓето со дијабетес, особено кај оние кои земаат инсулин.

Причините за низок шеќер во крвта кај луѓето со дијабетес вклучуваат: прекумерно внесување на инсулин или други лекови, прескокнување оброци или земање премалку храна, интензивна физичка активност, а исто така и прекумерно консумирање алкохол.

Симптомите на хипогликемија може да вклучуваат: треперење, главоболки, замор, заматен вид, тешкотии во концентрацијата и зголемено потење.

Секој кој често доживува симптоми на низок шеќер во крвта треба да оди на лекар.

Лавиринтитис

Лавиринтитис е вирусна или бактериска инфекција на внатрешното уво што може да предизвика вртоглавица. Оваа инфекција предизвикува воспаление на структурите во внатрешното уво, кои се клучни за одржување на рамнотежа. Лавиринтитисот може да им отежни на луѓето да стојат исправено, особено кога стануваат од кревет.

Други симптоми на лавиринтитис можат да бидат : болка во увото, главоболки, заматен или двоен вид како и гадење или повраќање.

Лавиринтитисот обично е предизвикан од вирус и често се јавува по настинка или грип. Третманот вклучува одмор и внес на течности, а може да се препорача и лекови за ублажување на симптомите на вртоглавица и гадење или антибиотици ако причината е бактериска инфекција.

Вртоглавица – како несакана реакција на лекови

Некои лекови може да предизвикаат вртоглавица како несакан ефект, вклучувајќи: антибиотици, диуретици, лекови базирани на опиоиди, антиепилептични лекови, имуносупресиви, антидепресиви, антипсихотици и антиретровирусни лекови.

Ако некој се сомнева дека лековите што ги користи предизвикуваат вртоглавица, треба да се консултира со лекар за можна промена на дозата или замена на терапијата.

Како да спречите вртоглавица по будењето?

Одредени промени во животниот стил можат да помогнат да се спречи или намали утринската вртоглавица:

• внес на доволно количество течност
• откажување од пушење
• намалување на внесот на алкохол
• урамнотежена исхрана
• избегнување на пијалоци со кофеин во вечерните часови
• доволно сон
• редовна физичка активност

Кога е неопходно да се посети лекар?

Луѓето кои повремено чувствуваат вртоглавица веројатно нема да треба да одат на лекар. Меѓутоа, ако вртоглавица се појавува редовно, важно е да се консултирате со вашиот лекар. Доколку се појави вртоглавица со загрижувачки симптоми како што се болка во градите, забрзана работа на срцето или силна главоболка, неопходно е веднаш да се побара лекарска помош.