Колегијалноста го продолжува животот

Пријатната работна атмосфера и искрениот колегијален однос се многу важни за здравјето на секој човек. Заклучокот доаѓа од истражување кое го направиле израелски психолози, а кое опфатило 820 вработени лица во период од две децении. За да бидат резултатите попрецизни биле одбирани работници со слични карактеристики и навики во однос на пушење, исхрана, бавење со физичка активност и слично.

Лицата одговарале на прашања врзани со нивната професија, условите во кои работат, нивните работни обврски и задачи, секојдневната атмосфера на работното место и односот со колегите. Психолозите потоа ги анализирале нивните здравствени картони и им го следеле животниот век. Се покажало дека подобро здравје и подолг живот имаат оние со изграден позитивен однос со колегите.

„Кога постои добра комуникација меѓу колегите, луѓето ја добиваат потребната поддршка, полесно поднесуваат стрес којшто е еден од главните причинители на многу болести“, објаснуваат истражувачите.

Во однос на полот, се покажало дека колегијалноста исто делува и врз жените и врз мажите, но сепак кога се работи за раководните позиции тогаш машкиот пол ужива поголема поддршка и доверба од колегите.