Колкав имот поседуваат новите гостиварски пратеници?

Законите налагаат пратениците како носители на јавна функција, да го обелоденат својот имот преку пополнување на Анкетен лист. Член 33 од Законот за спречување на корупција ги обврзува функционерите да го пријават имотот во рок од 30 дена од преземање на должноста. Во Анкетниот лист наведуваат детален опис на недвижен имот, личен и на членови од семејството, подвижни предмети од поголема вредност, хартии од вредност, побарувања и долгови.  Врз основа на тие податоци се следи, дали во текот на мандатот кај функционерите имало драстично зголемување на имотот, збогатување и дали  тоа го направиле на незаконски начин.

Комисијата за спречување на корупција јавно ги објавува Анкетните листови. Еве што пријавиле новите гостиварски пратеници.

Талат  Џафери од ДУИ поседува куќа во село Форино од 340 метри квадратни, стан во Скопје од 46 метри квадратни и ауди А4. Пријавил и фолсваген буба во сопствност на деца и два кредита.

Фадил Зендели од Движење БЕСА пријавил земјиште од 1.000 метри квадратни на подрачјето на општина Маврово Ростуше, куќа и стан како имот на родители и возило шевролет орландо (600 илјади денари) во лична сопственост.

Благојче Трпевски од СДСМ во Анкетниот лист има наведено куќа во Гостивар, куќа за одмор, градежно земјиште и двор на подрачјето на општина Маврово-Ростуше, пријавени како заеднички имот, куќа како имот на брат, куќа и двор како имот на родители. Лично поседува автомобил, голф 5(369 илјади денари) и поткровје од 75 метри квадратни во Гостивар.

За гостиварските пратеници од ВМРО и од НДП кои пред да станат дел од Собранието, беа членови на Советот на општина Гостивар, на веб страната се` уште стојат Анкетниот лист како советници.

Дафина Јовановска Стојаноска од ВМРО ДПМНЕ пријавила стан од 60 метри квадратни, автомобил-рено клио (854 илјади денари) како личен имот и банкарски депозити на име на деца.

Весел Мемеди од НДП, навел пежо 207 како лично негова сопственост и месечна плата од 42 илјади денари.

Јусуф Хасани од Демократска партија на Турците, според Анкетниот лист нема имот на свое име. Пријавените, куќа во Врапчиште, земјоделско земјиште, машни и опрема стојат како   имот на родители.

Мирсада Емини Хасани од ДУИ, има наведено две куќи и земјиште од еден хектар во село Чегране како имот на родители и две возила, голф 5 и голф 3 како имот на брачен другар.

Бранко Маноилоски од ДУИ, кој беше прогласен за почесен граѓанин на Гостивар, има зграда во државата Илиноис, САД, месечна рента од 660 илјади денари и девизен депозит од 1,5 милиони денари во странска банка.