Колку е здраво да јадете ајвар?

Еден од највкусните специјалитети на балканската кујна е ајварот. Во септември доаѓа неговото време, па сите се растрчани во потрага по квалитетни, убави црвени пиперки за омилената зимница да се погоди како што треба. Некој го сака како намаз на лепче, други како салата или прилог со некое јадење. Како и да е, речиси сите го имаат многу често на своето мени. Затоа е добро да се знае дали ајварот е здрава или штетна храна, колку калории содржи и слично.

Во 100 грама ајвар има од 80 до 100 калории, што не е вредност која треба да ги загрижи оние кои внимаваат на килограмите. Сепак, мора да се внимава на количината леб и сирење што се јадат со него, затоа што токму во комбинација (која рака на срце е неодолива) лежи дебелеењето. Во својот состав ајварот најмногу има масти, по што следуваат јаглени хидрати и на крај протеини. За жал, не може да се пофали со витамини, минерали и некои корисни елементи. Главна состојка му се пиперките кои се богати со витамин Ц, но тој во голема мера се губи при печењето и варењето. Добрата вест е што во ајварот се задржува витаминот А, кој се смета за активен анти оксиданс.

Генерално, ајварот не може да се сврсти во здрава храна и од него човековиот организам нема некоја голема корист, без оглед на тоа што е домашно приготвен специјалитет. Сепак не е ни штетен, па кој сака слободно може да си ужива во неговиот вкус.