Компании од Словачка разгледуваат можност за инвестиции во Гостивар

Претставници од компании од Словачка кои делуваат во областа на „смарт“ технологијата денес беа во посета на општина Гостивар за да ги разгледуваат можностите за инвестиции и соработка. Претставниците од фирмите, заедно со бившиот амбасадор на Словачка, Роберт Кирнак кој важи за голем пријател и лобист за Гостивар, остварија средба со градоначалникот Арбен Таравари.

„Ова е средба на која се разговара за можности за развивање заедничка соработка за реализација на проекти од енергетиката во правец на „смарт сити“. Заедно разговаравме за можностите за примена на интелигентни технологии во областа на јавното осветлување и инсталирањето на иновативни електрични полначи во Општина Гостивар. Општина Гостивар во изминатиов период имаше вакви инвестиции со свои средства и има капацитет за вакви иновативни технологии.“, рече градоначалникот.

Кирнак изрази пофални зборови за Гостивар и изрази надеж за соработка. „Тука сме со напредни компании кои нудат комплексни, интелигенти, паметни решенија за струја, осветлување, дополнувачи на електрични автовмобили. Сакаме да размислуваме што би можеле заедно да правиме. Знаеме дека Гостивар во неколку области е лидер меѓу градовите во Северна Македонија. Оваа електронизација и на автомобили и штедењето, е иднина и ако сега почнеме можеме да бидеме лидери заедни и во оваа област.“, нагласи Кирнак.

Доколку официјално се воспостави соработка меѓу гостиварската општина и компаниите кои денес беа во посета, ќе може да се користат пари од Словачкиот фонд за предизвици, кој поддржува проекти со вредност од 20 до 40 илјади евра.