Комплексот Аква парк во Гостивар ќе се гради со приватно-јавно партнерство

Реализација на забавно-рекреативниот комплекс, воден парк во Гостивар, ќе биде на принцип на јавно-приватно партнерство, информираше гостиварската локална самоуправа.

Идејното решение, кое беше избрано преку тендер, локалната власт ќе го откупи за 50 илјади денари, но се уште не се знае колку ќе чини самата изградба на паркот. Општинарите наведуваат дека проектот ќе биде економичен  и нема да го оптовари општинскиот буџет, со оглед дека ќе се најде фирма со која ќе се оствари соработка за инвестирање.

Во проект предвидено е комплексот да има базени за спирални тобогани, за брзи тобогани, базен со бранови, мрзлива река, плиток базен за деца до четири години и детски базен за деца од 4 до 14 годишна возраст. Покрај технички простории, паркинг, гардероби и тоалети, во комплексот ќе функционираат ресторан и кафетерија. Сето тоа ќе опфаќа површина од над 2 илјади квадратни метри.

Како локација за водениот парк  е определена зона во Урбаниот блок 16, на десниот брег на Вардар во населбата Дутлок, помеѓу двата фудбалски стадиони, која во урбанистичките планови е предвидена за спортско-рекреативни активности.

Според најавите, изградбата би се реализирала во текот на следната година.