„Комуналец“ Гостивар со апел за рационално користење на водата

Во летниот период вообичаено се зголемува потрошувачката на вода, како поради високите температури, така и поради престојот на печалбарите во родниот крај. Од ЈП „Комуналец“ Гостивар нагласуваат дека рационалното користење на водата е многу важно.

„Високите температури придонесуваат за зголемен обем на вода што ја користат жителите, што предизвикува намалување на притисокот во нашите водни резерви и системи за водоснабдување. За да не се соочиме со недостиг на вода, ги повикуваме сите граѓани да се однесуваат одговорно и да спроведат мерки за заштеда на вода во секојдневниот живот. Ве молиме сериозно да ги спроведете мерките за заштеда на вода, како што се избегнување на непотребна потрошувачка на вода, особено за миење дворови, миење патишта и полевање на парцели засадени со земјоделски производи.“, се вели во денешното известие од претпријатието.