Во чест на Илинден, коњаницата утре од Зубовце тргнува по патот на црешовото топче

Во чест на националниот и државен празник Илинден, по десетти пат, група коњаници членови на коњаницата „Бигорски Манастир – Патот на црешовото топче“ , утре (26 јули) тргнуваат од гостиварско до славното Крушево.

Според најавите, коњаницата ќе тргне од 8 часот наутро од гостиварското село Зубовце, по што ќе се упати кон Тумчевиште, а во 14 часот коњаниците ќе пристигнат во црквата „Св. Богородица“ на плоштадот во Гостивар, каде ќе добијат благослов за својот пат и ќе се упатат кон Манастирот Св. Јован Бигорски.

Во манастирот, во сабота наутро по литургијата, свечено ќе положат заклетва и со благослов на игуменот Партениј, својот марш ќе го продолжат кон Крушево.

Коњаницата ќе го помине патот од околу 200 километри по кој било пренесено првото црешово топче за поддршка на илинденските востаници. На 2 август коњаниците ќе учествуваат на прославата 10 дена Крушевска Република.