Концерт на ГАКУД „Браќа Ѓиноски“ за 8 Септември: Да ја сакаме и почитуваме татковината!

Градското аматерско културно-уметничко друштво „Браќа Ѓиноски“ вчеравечер во Гостивар одржа  концерт на македонски народни ора и песни по повод претстојниот празник, 8 Септември, Денот на независноста на Република Македонија.

Настанот помина во духот на традицијата и македонскиот фолклор, преку што се оддава почит кон вредностите кои треба да се негуваат и пренесуваат низ генерациите.

„Датумот 8-ми септември испишува историја, моќ и сигурност на секој од нас. Овој државен празник заслужува почит, благодарност и внимание. Празников нѐ потсетува на предизвиците кои сме ги надминале, но и ни дава сила и мудрост да продолжиме понатаму. Да ја сакаме и почитуваме татковината, таа е нашиот идентитет, јазик и култура, таа е богатство кое ни го оставија нашите предци. Mакедонските народни ора, песни и музика ја одбележуваат нашата вековна традиција. Тие се обележје на нашиот народ и култура, македонските ора се бројни и разновидни. Со нив се претставувавме пред светот, со нив ќе празнуваме и ќе другаруваме. Честит и вековит да ни е денов татковино!“, беше речено во поздравното обраќање.

Играорците пред домашната публика се претставија со исконски македонски ора: Пајдушко, Бувчанско, Водарки, Тресеница и Повардарие, а пејачот Јовица Николоски изведе неколку познати македонски народни песни. Оркестарот на културно-уметничкото друштво беше присутен во целата програма на концертот.

Денот на независноста на Македонија во Гостивар се одбележува со неколку настани. Во четвртокот беше прикажана кино проекција, додека денес (7 септември) се одржа свечен собир.