Контроли во Гостивар: Заборавете на телефонот додека возите

Користењето мобилни телефони од возачи ќе биде еден од главните сообраќајни приоритети деновиве на гостиварското подрачје, најави полицијата. Надлежните потсетуваат дека користењето на телефон зад волан е спротивно на Законот за безбедност на сообраќајот на патиштата и апелираат возачите да ги почитуваат правилата, за да не се изложуваат себе си и другите на опасност. Сообраќајците низ улиците на Гостивар и населените места наредниот период засилено ќе вршат контроли за откривање на прекршувања од ваков вид. Оние кои ќе бидат фатени ќе се соочат со соодветни казни, парична во висина од 40 евра или 25 негативи бода во возачката книшка.

Според истражувањата на Републичкиот совет за безбедност на сообраќајот на патиштата во Македонија 63% од возачите користеле мобилен телефон додека возеле. Младите возачи до 30 години, двапати повеќе користат мобилен телефон додека возат, од возачите на возраст над 30 години. Употребата на мобилен телефон додека возачот управува моторно возило станува причина број еден за одвлекување на вниманието кај возачите.