Контролни обиколки низ улиците во Гостивар поради големиот број на питачи

Во пресрет на новогодишните празници, со пристигнувањето на печалбарите во родните краишта, низ гостиварските улици вообичаено се зголемува бројот питачи. Голем дел од нив организирано доаѓаат од други градови, а со себе носат и деца кои ги оставаат да бараат пари од минувачите по улица.

Со цел да се спречат или барем ублажат ваквите појави, Центарот за социјални работи од Гостивар, во координација со полицијата перидов презема контролни активности два пати во неделата.

„Семејствата од Гостивар коишто питачат ни се познати и со такви работиме во текот на целата година,  укажувајќи им на штетните последици, на влијанието врз децата и слично. Поголем проблем се тие што доаѓаат од другите места, обично за време на празниците или налето. Периодов, со оглед дека е сезона на печалбарите, задолжително правиме контролни обиколки заедно со полицијата и тоа два пати неделно. Со затекнатите питачи се врши разговор, па потоа ги испраќаме во градовите кадешто живеат. Доколку повторно истите се вратат и ги затекнеме, следува предупредување и на крај казна што ја одредува полицијата, согласно законските мерки.“, рече Мухамед Таири од Центарот за социјална работа во Гостивар.

Службите велат дека сепак, најголем акцент се става на превенцијата, а не на казнувањето, со  цел да се делува врз свеста дека питачењето, особено инволвирањето на децата во такви активности може да имаат сериозни последици.

Инаку, питачењето е спротивно на Законот за прекршоци против јавниот ред и мир и за ваков вид прекршок е предвидена глоба од 15 до 50 евра.