Концерт во Летниот амфитеатар во Гостивар – Музиката како мост на зближување

Летниот Амфитеатар покрај Вардар во Гостивар, вчеравечер беше место исполнето со музика во духот на мултикултурата и заедништвото. Во рамки на манифестацијата „Заедно под отворено небо“, што ја организира гостиварскиот Совет на млади, се одржа концерт со учество на културно уметнички друштва, пејачи и бендови од Гостивар. Настапија: План Г, Перо Пандиловски, Хајдар Хајдари, Кристина Јовановска, Теодора Матеска, Леутрин Есади, Чоскун Јусуф и фолклорните друштва „Беса“, „Браќа Ѓиновски“ и „Блаже Конески“.

„Нашиот град е град исполнет со различности кои не` зближуваат на еден посебен начин. Горда сум што потекнувам од едно такво богато културно општество и сметам дека сите треба да го негуваме и цениме“, рече Флоранда Мухареми, потпретседател на Совет на млади и носител на проектот.

Во склоп на манифестацијата, предвиден е и забавен настан за децата од Дневниот центар и од неколку основни училишта, како и поетско читање со учество на членови на Клубот на млади поети, кое ќе се одржи вечерва во Центарот за култура со почеток во 19 часот.

Настаните се реализираат во рамки на проектот „Нов културен бран“, со поддршка на Министерството за култура.