Координација за поголема безбедност во училиштата во Гостивар

Во насока на спроведување мерки и активности за поголема безбедност во училиштата и нивниот круг, денес во Гостивар се одржа координативен состанок на надлежните институции. На средбата своите мислења и предлози ги образложија претставници од општината, Министерството за внатрешни работи, директорите на основните и средните училишта, како и педагошко-психолошките служби и родители.

Состанокот го организираше општинскиот Сектор за образование.

„Безбедност и сигурноста на децата е најважна. Затоа и организираме вакви координативни средби на почеток на училишната година, на полугодие и на крајот. Училишните управи треба да бидат во контакт со полицијата, со која цел и споделуваме броеви за контакти. Инаку, по еден полицаец е ангажиран за секое училиште. Лани имавме присуство и на цивил полицајци на почеток на смената и на крајот, мислиме дека така децата се побезбедни и таа пракса треба да продолжи. Како општина имаме ангажирано обезбедување во средните училишта, бидејќи тука може да се јави проблем, затоа што се работи за поголеми деца.“, истакна раководителката на Секторот за образование, Аслијан Снопче.

Таа додаде дека според сознанијата од МВР состојбата во училиштата моментално е стабилна и не бил регистриран некој потежок инцидент.