Короназаразата зема замав меѓу граѓаните во Гостивар, денес +10 нови случаи

Состојбата со ширењето на коронавирусот на подрачјето на Гостивар се влошува. Трендот на зголемување на бројката на новозаразени граѓани, кој започна на почетокот на јули продолжува и понатаму. Неделава, од понеделник до петок, Министерството за здравство регистрираше вкупно 68 нови случаи. Истиот период оздравеле 30 пациенти, а еден починал.

Денес (сабота, 1 август), Министерството за здравство потврди 10 новозаразени и 1 оздравен.

Во дневните извештаи Гостивар постојано е меѓу првите неколку региони по новозаболени во Македонија. Според податоците од Институтот за јавно здравје, активно болни моментално има над 260. Со ова гостиварско е на трето место, по Скопје и Штип.

Со оглед дека рестриктивни мерки сега нема, дали ќе се спречи ширењето на заразата или не, пред се зависи од свеста на граѓаните, колку ќе се почитуваат мерките: носење маска, држење растојание и редовна хигиена.

Од почетокот на пандемијата во гостиварско со ковид вкупно се дијагностицирани 450 лица. Од нив 157 оздравеле. Како последица на компликација од вирусот, починале 24 граѓани.

Најголемиот број од активно болните, околу 80% се од територијата на Општина Гостивар, по која следува Врапчиште и неколку случаи во Маврово Ростуше.

МЗ соопшти дека во последните 24 часа во земјава се направени 1.621 тестирања, а регистрирани се 138 нови случаи на ковид-19, од кои најмногу во Скопје (47), Куманово (17), Штип (16) и Гостивар и Дебар по 10.