Косовскиот министер за одбрана Мехај стана почесен граѓанин на Гостивар

Со предавање на симболичниот „Клуч на градот“ денес во просториите на општината, министерот за одбрана на Косово, Арменд Мехај беше прогласен за почесен граѓанин на Гостивар. Признанието му го врачи градоначалникот Арбен Таравари, кој во оваа прилика истакна дека бил импресиониран од биографијата на Мехај како млад успешен човек.

„Чест и задоволство ми е во мое лично име, и во име на сите граѓани на Гостивар да му доделам Клуч на градот на човек кој е многу влијателен. Кога ја читав неговата биографија се фрапирав, млад по години, роден 1981 година, во детството отиден во Норвешка, професионалец, образовано воено лице од Кралството Норвешка, актуелен министер за одбрана на Косово. Кога даваш клуч некому значи имаш доверба во него. Освен што сме горди што овој човек станува дел од градот, на некој начин му даваме и обврска да лобира и помага за нашата општина“, изјави градоначалникот.

Гостинот се заблагодари на укажаната чест и подвлече дека му е особено драго што станува почесен граѓанин на Гостивар и на овој начин се врзува пријателски со општината.

На настанот присуствуваше и заменик министерот за одбрана на Македонија, Тирон Јајага.

Во март годинава, за почесен граѓанин беше прогласен и градоначалникот на Тирана, Ерон Велиај.