Ковид КРИЗА: Бројката на социјалци во Гостивар стигна до 4.000

Коронакризата ги осиромаши граѓаните. Пропаѓаат бизниси, работници остануваат без своите работни места. Во Гостивар од почетокот на пандемијата се бележи значителен пораст на социјално загрозени семејства. Според податоците од Центарот за социјална работа, бројката на корисиници на гарантирана минимална помош се зголемила за околу 40% и достигнала до 4.000.

„Рапидно расте бројот на корисници на гарантирана минимална помош од како почна пандемијата. Тоа се почувствува особено кога имаше карантини, ограничување на движењето и на работата на локалите. Многу луѓе останаа без работа, без основните средства за егзистенција. И тоа е процес кој трае, значи бројката постојано се зголемува“, вели Азби Шаќири, в.д. директор на Центарот.

Гостиварската локална економија и населението финансиски беа погодени и од недоаѓањето на иселениците, што повторно е поврзано со ковид пандемијата. За дуќаните и угостителите, немаше работа како вообичаено во сезоните кога печалбарите го посетуваа родниот крај. Голем број граѓани од работници, станаа социјалци.

Во Центарот за социјална работа во Гостивар, месечно се поднесуват по стотина нови барања за користење гарантирана минимална помош. Посебна комисија ги разгледува документите, прави увид на терен и утврдува дали реалната состојба е соодветна на прикажаната на хартија. Социјална помош се одобрува на барателите коишто ќе ги исполнат законските критериуми.