Крадци однеле 120 метри заштитна ограда на автопатот

Вработен во гостиварската секција на „Македонија пат“, пријавил кражба на заштитна оградна покрај автопатот Гостивар-Тетово, во близина на Неготинскиот надвозник.

Како што информираат од полицијата, засега непознати сторители, успеале да одземат  ограда во должина од 120 метри, со височина од метар и половина, која била поставена на метални столбови. Материјалната вредност се проценува на околу 90 илјади денари.

Токму недоволната обезбеденост со заштитна ограда на автопатот е причина за голем број сообраќајки предизвикани од животни кои излегуваат на коловозот пред возилата. Последната таква е регистрирана вчера попладне, на околу два километри од наплатата станица Гостивар. Автомобил „БМВ“ со тетовски регистерски таблици, управувано од 38-годишен тетовец, поради необезбеден коловоз, удрил и усмртил куче-бездомник, кое неконтролирано се движело.

Повредени лица во возилото нема, додека причинетата материјална штета се проценува на 20 илјади денари, соопштуваат од Секторот за внатрешни работи.