Крадците користат прилика и ограбуваат додека граѓаните се на гости или слават

Домовите стануваат лесна мета на крадци во сезоната на матурски прослави, семејни свечености и за време на рамазанските пости, кога граѓаните во еуфоријата на славењето, не се доволно внимателни. Крадците го користат отсуството на домашните и вешто и брзо вршат кражби на пари, накит и други вредни работи. Искуството од минатите години, потврдува дека голем дел од кражбите во гостиварскиот регион, се случуваат токму во периодите на прослави и празници. Граѓаните оставаат незаклучени врати и подотворени прозорци, а на арамиите не им треба многу време за да влезат, да ги пребараат просториите и да се „офајдат“.

Препораките на полицијата се граѓаните кога  отсуствуваат од дома, одат по гости или пак на прослави, задолжително да ги заклучуваат влезните врати и да не ги оставаат прозорците подотворени. Оние кои имаат можност да набават соодветна алармна или друга видео опрема да го направат тоа, со што непосредно ќе придонесат за поефикасна заштита на куќите и становите.

Пред неколку дена, крадци го искористиле неколкучасовното отсуство на домаќините и од куќа во Гостивар украле околу 20 илјади евра.