Краен рок за пријави за ДДВ на обврзниците со повисок промет од милион денари

Даночните обврзници кои во претходната календарска година оствариле вкупен оданочлив промет од вршење на стопанска дејност повисок од 1.000.000 денари имаат обврска да поднесат Пријава за регистрација за целите на данокот на додадена вредност најдоцна денес, 15 јануари 2019 година.
Во истиот рок, даночните обврзници кои оствариле промет понизок од милион денари може доброволно да се регистрираат за целите на ДДВ. Управата за јавни приходи потсетува дека даночни обврзници за ДДВ можат да бидат сите правни и физички лица, како и здружувањата на лица кои вршат оданочив промет од извршување на стопанска дејност.
Пријавата за регистрација може да се преземе преку веб страницата на УЈП http://www.ujp.gov.mk/mk/obrasci/opis/189 и може да се достави по пошта, лично до Регионалната дирекција на УЈП или по електронски пат.

За подобро информирање на даночните обврзници – физички лица по однос на правата и обврските кои произлегуваат од Законот за данок на додадена вредност, изработен е Водич со корисни информации и упатства за предметот на оданочување со данок на додадена вредност, пресметувањето на вкупниот промет за цели на регистрација за ДДВ, начинот на регистрација за цели на ДДВ, како и појаснувања за останатите права и обврски на даночниот обврзник.