Крај на необичната учебна 2019/2020-та година

Денешниот е последен работен ден од учебната 2019/2020 година. За околу 10.500 ученици од основните и средните училишта на подрачјето на Oпштина Гостивар, од утре официјално започнува летниот распуст.

Оваа учебна година ќе се памети по вонредните услови, односно затворањето на училиштата од 11 март поради ковид пандемијата. Учениците беа испратени дома, а по извесно време отпочна онлајн настава, која пак донесе низа потешкотии и предизвици. Голем дел од семејствата не беа во можност да обезбедат електронски уреди и интернет за децата да се вклучат во далечинското учење. Драгоцено време се изгуби и додека надлежните се координираа за начинот на спроведување на наставата, програмата и која платформа да се користи. Како и да е, учебната година треба да се заокружи исто како и другите претходни, со утврдени оценки за учениците, внесени часови и податоци во дневниците и сл.

Коронавирусот донесе промени и во уписите на првачињата, кои наместо како вообичаено во мај, се одвиваат во текот на месец јуни. За матурантите пак, беше донесена одлука да не полагаат државна матура.

Полуматурантите ги очекуваат уписи во средните училишта, а првото пријавување ќе се спроведе на 16-ти и 17-ти јуни.

Какви ќе бидат условите за настава од септември, за сега е тешко да се предвиди.