Кражба на пари, накит и пиштоли во стан во Гостивар

Голема кражба во стан во Гостивар. Крадци од дома му ги украле парите, накитот и пиштолите на гостиварец.

Како што информира портпаролот на СВР Тетово, Марјан Јосифоски, 56 годишниот гостиварец со иницијали Д.С. ја пријавил кражбата вчера попладне, а се случила во периодот помеѓу 7.30 и 16.30 часот, додека во станот немало никој. Засега непознати сторители, во зградата на ул „Гоце Делчев“ влегле низ влезната врата која била отклучена. Во станот на гостиварецот провалиле со кршење на влезната врата. Украле 50 илјади денари и повеќе парчиња разновиден накит: синџири, нараквици, привезоци, прстени. Крадците не запреле тука, и ги украле и двата пиштола, кои гостиварецот ги поседувал со дозвола. Едниот од нив го зеле сосе дозволата. Се проценува дека се стекнале со вкупна материјална корист од еден милион 373 илјади денари.

Извршен е увид, подигнати се траги за вештачење и се работи на откривање на сторителите, соопштуваат од полицијата.

Ова е трета поголема кражба во Гостивар во период од недела дена. Претходно, мета на крадци беа филијала на компанија за трансфер на пари и куќа.