Кражби на возила – Заклучувајте ги автомобилите и не оставајте пари и накит во нив

Кражбите на автомобили како и на вредни предмети во нив, на гостиварското подрачје не се нова појава.  Граѓаните неретко ги оставаат отклучени и необезбедени, па возилата стануваат лесна мета на крадци. Последниот ваков пример беше регистриран на паркинг пред општата болница, кога крадци од џип украле пари додека сопственичката била на преглед.

Поради ваквите случаи, Секторот за внатрешни работи Тетово ги потсетува сопствениците на возила задолжително да ги заклучуваат, да не ги оставаат клучевите во брава и доколку имаат можност, квалитетно да ги обезбедат со адекватна опрема.

„Им се советува, исто така, на достапни места во возилата, пред се на седиштата или во внатрешниот преден дел, да не оставаат чанти, лаптопови, мобилни телефони, очила за сонце или разна кожна галантерија. Зашто, токму тие предмети се најпривлечни за крадците, кои брзо оперираат, ги провалуваат возилата, посебно во вечерните часови, а потоа уште побрзо се оддалечуваат од местото“, апелира СВР.

Полицијата повикува кражбите веднаш да се пријавуваат за да се преземат навремени и ефикасни мерки за откривање и санкционирање на сторителите.