Креативно и уникатно – Аптека издава песни на рецепт

Во малиот британски град Шорпшир поетесата Дебора Алма, решила да отвори поетска аптека, затоа што верува дека во случај на психолошки здравстени тешкотии нема подобар лек од поезијата. Така таа, на своите „пациенти“ наместо таблети и сирупи им препишува стихови.

Алма последните шест години водела „Итна поетска служба“ која посетувала училишта, фестивали, компании и од амбулантно комбе им делела поезија на луѓето како лек за нивните душевни маки.

Но, кога ја видела малата напуштена продавница заедно со својот партнер, Чејсон Шерд, кој исто така е поет, решиле да ја претворат во поетска аптека-книжарница.

Книгите во дуќанот се подредени според расположение, па може да се одберат содржини против исцрпеност и замор, стрес, нервоза како и скршено срце.

Дебора нуди и поетски консултации, на кои „пациентите“ добиваат низа прашања за нивната состојба, по што таа им одбира соодветна песна или книга да ги залечи.