Кремљ: Прекинот на испораката на оружје од САД за Украина е чекор кон мир

Портпаролот на Кремљ, Дмитриј Песков, изјави денеска дека доколку САД навистина ја прекинат воената помош за Киев, тоа би бил „најдобриот придонес за мирот“. Според него, Кремљ сè уште чека официјални информации за деталите околу можното суспендирање на испораките на американска воена поддршка за Украина.

Песков истакна дека одлуката на САД може да го поттикне режимот во Киев да се насочи кон мировен процес. „Ако оваа информација е точна, тоа е чекор што навистина би можел да придонесе за мир“, рече тој, додавајќи дека доколку САД престанат да бидат главен „добавувач“ на конфликтот, тоа би имало позитивно влијание врз ситуацијата.

Тој, исто така, ја поздрави намерата на американскиот претседател Доналд Трамп да донесе мир во Украина. Според Песков, за време на првиот мандат на Трамп биле воведени бројни санкции против Русија, а почнале и испораките на оружје за Украина, што, според него, не го прави Трамп „проруски“ ориентиран, иако такви обвинувања често се слушале.

На 3 март, Ројтерс објави, повикувајќи се на портпарол на Белата куќа, дека Трамп наредил целосно запирање на испораките на воена помош за Украина. Оваа одлука, наводно, дошла по вербален судир меѓу Трамп и украинскиот претседател Володимир Зеленски во Белата куќа минатиот петок, при што американскиот претседател го обвинил Зеленски за недостаток на благодарност за поддршката што САД ја пружиле во војната со Русија.

Песков, исто така, потенцираше дека европските земји веројатно ќе се обидат да го компензираат намалувањето на американската помош. „Гледаме дека некои европски земји сè уште обезбедуваат поддршка, што веројатно ќе го надомести недостигот“, додаде тој, истакнувајќи дека Кремљ внимателно ќе ја следи ситуацијата.

Во однос на можноста за ублажување на санкциите против Русија, Песков рече дека нема официјални изјави од Вашингтон на оваа тема. „Санкциите се незаконски и ние сме против нив. Доколку сакаме нормализација на билатералните односи со САД, тие треба да се ослободат од овој товар“, нагласи тој.