Кривични против стотина лица во Гостивар кои не почитувале антиковид прописи

Секторот за внатрешни работи Тетово информира дека во деветте месеци од годинава евидентирани и соодветно расчистени се вкупно 197 кривични дела „непостапување според здравствени прописи за време на епидемија“, казниво по член 206 од Кривичниот законик, а за кои е предвидена парична или казна затвор до една година. Од нив 111 се во Тетово и 86 во Гостивар. Најголемиот дел биле непочитувања на задолжителна изолација.

Покрај тоа, во овој период регистрирани се и 35 кривични дела „пренесување заразна болест“, за кои согласно член 205 од Кривичниот законик предвидена е парична или казна затвор до три години. Овие кривични дела биле заокружени со 230 кривични пријави (Тетово-145 и Гостивар-85) против 308 сторители (Тетово-211 и Гостивар-97).

Во периодот за кој станува збор за непочитување на владината мерка за спречување на ширењето на „ковид-19“ со задолжително носење на заштита на лицето биле изготвени вкупно 13.289 поднесоци (Тетово-7.733 и Гостивар-5.556).