Кризен штаб Гостивар: Час поскоро да има протоколи за отворање на летните тераси на локалите

Олабавување на рестриктивните мерки и подготовка на протоколи за отворање на летните тераси на угостителските објекти. Ова се предлозите на Меѓуопштинскиот Кризен штаб, кој денес на состанок ја разгледуваше состојбата со коронавирусот во општините Гостивар, Врапчиште и Маврово Ростуше.

„До централниот Кризен штаб уште еднаш го доставуваме предлогот, полицискиот час во работни денови да почнува од 23 часот и да трае до 5 наутро, а за викендите да биде од 21 часот до 5. Исто така, предлагаме Владата што поскоро да подготви протоколи за отворање на летните тераси на рестораните и кафулињата. Сметаме дека тие се мали бизниси кои се многу важни за локалната економија“, рече градоначалникот на Гостивар, Арбен Таравари во својство на претседател на штабот.

Надлежните оценија дека состојбата во регионот е под контрола и е стабилна, а граѓаните генерално ги почитуваат донесените мерки и препораки.

„Ги молиме сите граѓани и во идните денови, кога ќе има олеснување на одредени мерки, уште повеќе да се придржуваат до препораките за заштита  од коронавирусот“, нагласи Таравари.

Во општините Гостивар, Врапчиште и Маврово Ростуше од вчера е дозволена продажба на кафе во кафетериите по шалтерски систем. Дозволата за продажба на кафе по принципот „купи и оди“, дојде по  барање на Меѓуопштинскиот кризен штаб.