Кризен штаб Гостивар: Полициски час од 23 до 5 наутро, инсистираме дозвола за кафетериите да проработат

Локалниот Кризен штаб на општините Гостивар, Врапчиште и Маврово Ростуше испраќа барање до централиот штаб за скратување на полицискиот час. Се предлага во работни денови полицискиот час да биде од 23 навечер до 5 наутро, додека во викендите од 19 до 5 часот.

„Констатиравме дека состојбата во општините кои спаѓаат во овој локален штаб е многу стабилна. Граѓаните стрикно се придржуваат до правилата и мерките, така треба да продолжат и во периодот што следи. Како и минатата недела, и оваа испраќаме наши барања до централниот штаб. Нашиот став е дека полицискиот час треба да се скрати, и тоа во работните денови да биде од 23 до 5 часот, додека во викендите од 19 до 5. Уште еднаш бараме да се дозволи кафетериите да работат по шалтерски систем. Тоа го баравме и минатата недела, и иако на седницата на 30 април, Владата донесе заклучок во кој се вели дека може да работат по систем „земи и оди“, се уште немаме официјален документ за оваа одлука, за да може тоа што го решиле на седницата, ние да го практикуваме на терен.“, изјави градоначалникот Арбен Таравари, како претседател на локалниот штаб.

На денешниот состанок на штабот, претставници од институциите и установите во Гостивар изнесоа куси извештаи за активностите што ги спроведуваат во нивна надлежност и состојбите врзани со коронавирусот. Општ заклучок беше дека нема значајни промени и ситуацијата е во границите на нормалата.