Кризен штаб: Во Гостивар крајно сериозна состојбата со корона, мерките не се почитуваат

Кризниот штаб на Гостивар на денешниот состанок ја оцени состојбата со коронавирусот во гостиварскиот регион како крајно сериозна. Од граѓаните и понатаму се бара внимателност и следење на препораките за заштита, како и од институциите кои се вклучени, мора поактивно да апелираат до граѓаните да бидат посевесни и да се придржуваат до препораките.

„Од податоците со кои располагаме, вкупниот број на заболени е 572, бројот на активни случаи во регионот на Гостивар е 261, од кои 214 се од Гостивар, 32 во Општина Врапчиште и 5 во Општина Маврово и Ростуше. Бројот на починати лица изнесува 28, од кои 20 се од Гостивар, 7 од Општина Врапчиште и 1 од Маврово и Ростуше. Оздравени пациенти се 283. Апелираме до граѓаните да се придржуваат до препораките како што се носење на маска, одржување социјална дистанца и одржување на лична и колективна хигиена. Исто би апелирале и до инволвираните институции кои не се редовни на меѓуопштинскиот кризен штаб, да дојдат и дадат свој придонес во справувањето со пандемијата, рече Валбон Лимани шеф на кабинет на градоначалникот на Општина Гостивар.

Вкупниот број на тестирања од почетокот на пандемијата во гостиварскиот регион изнесува 1.954.

На денешниот состанок на штабот, претставници од институциите и установите во Гостивар изнесоа куси извештаи за активностите што ги спроведуваат во нивна надлежност и состојбите врзани со коронавирусот.