Крвав инцидент меѓу браќа во Чегране

Педесет и седум годишен жител на гостиварското село Чегране завршил во болница со убодна рана во стомакот. Неговиот шест години постар брат е осомничен дека му ја нанал раната со нож.

Како што соопштуваат од полицијата, повредениот вчера попладне со своето возило, во кое се наоѓал и нивен роднина, стигнал на нива близу селото, каде го забележал постариот брат кој работел на оградата. По куса расправија, се степале, а постариот, кој во еден момент бил паднат долу на земјата,  извадил нож и го прободел братот во стомакот. Браќата за нивата воделе судска постапка.

Повредениот бил пренесен во гостиварската болница и по укажаната лекарска помош, а по барање на најблиските, бил префрлен во Скопје.

Надлежните информираат дека Јавен обвинител и екипа од Полициската станица Гостивар извршиле комплетен увид, осомничениот е лишен од слобода, задржан во Полициската станица и по целосното расчистување на сите поединости ќе се соочи со соодветна пријава.